Қазақстан Кубогы: Астанада конкурдан республикалық жарыс өтеді
29-30 тамыз күндері Астанада конкурдан Қазақстан Республикасының Кубогы өтеді. Республикалық деңгейдегі жекелей жарысқа еліміздің спортшылары қатысып, биіктігі 100-ден 130 сантиметрге дейінгі кедергілерді бағындырады.
Бәсеке елордадағы «Арғымақ» ат спорты-сауықтыру кешенінде ұйымдастырылады. Жарыстың негізгі мақсаты – Қазақстанда ат спортын дамыту, ұлттық құрама мүшелерінің шеберлігін арттыру, перспективалы шабандоздар мен жылқыларды анықтау және төрешілердің кәсіби деңгейін жетілдіру.
Кубок бағдарламасына алты маршрут енгізілген. Бірінші жарыс күні, 29 тамызда, сағат 10:00-де жарыстың ашылу салтанаты өтеді. Одан кейін спортшылар биіктігі 100, 110 және 120 сантиметр болатын үш маршрутта бақ сынайды.
30 тамызда жарыстың екінші күні өтеді. Спортшылар бұл күні 110, 120 және 130 сантиметрлік үш маршрут бойынша өнер көрсетеді. Осылайша, жарыс барысында кедергілердің биіктігі біртіндеп артып, шабандоздар мен олардың серіктес жылқыларының шеберлігі мен үйлесімділігі сыналады.
Жарысқа ерлер мен әйелдер тең жағдайда қатысады. Маршруттардың күрделілігіне қарай спортшылардың ең төменгі жасы 12 немесе 14 жас болып белгіленген. Ал жылқылардың жасы маршрутқа қарай кемінде 6 немесе 7 жаста болуы тиіс.
Кубокқа қатысатын жылқылардың Қазақстан Республикасы Ат спорты федерациясының ұлттық спорт жылқысы паспорты болуы қажет. Сондай-ақ шабандоздар мен жылқылардың Федерацияда тіркелуі міндетті.
Жарыс тек спорттық нәтиже үшін емес, ат спортын көпшілікке кеңінен танытуға, жас спортшыларға мүмкіндік беруге және Қазақстандағы конкурдың кәсіби деңгейін одан әрі арттыруға бағытталған.