11 шілде – Дүниежүзілік жылқы күні

11 шілдеде әлемде алғаш рет Дүниежүзілік жылқы күні атап өтіледі. Бұл күн 2025 жылы БҰҰ Бас Ассамблеясының 79/291 қарарымен бекітіліп, бастаманы 169 мемлекет қолдады.

Дүниежүзілік жылқы күнінің Қазақстан үшін тарихи маңызы ерекше. Ғылыми зерттеулерге сәйкес, Солтүстік Қазақстан аумағындағы Ботай мәдениеті жылқыны ерте қолға үйрету тарихымен тығыз байланысты. Археологиялық деректер бұл үдерістің шамамен 5 500 жыл бұрын басталғанын көрсетеді.

Жылқы ғасырлар бойы адамзат өркениетінің дамуына ықпал етті. Ол көлік пен шаруашылықтың, сауда мен байланыстың дамуына жол ашып, көптеген халықтардың мәдениеті мен тұрмысында маңызды орын алды.

Қазақ халқының тарихында жылқының орны айрықша. Атқа міну мәдениеті, жылқы өсіру дәстүрі және атбегілік өнер ұлттық болмыстың ажырамас бөлігіне айналды. Бүгінде бұл тарихи сабақтастық заманауи ат спортында жалғасып келеді.

Қазақстан Республикасы Ат спорты федерациясы елімізде ат спортын жүйелі дамыту, спортшылардың халықаралық жарыстарға қатысуына жағдай жасау, кәсіби даярлық деңгейін арттыру және жас буынды ат спортына тарту бағытында жұмыс жүргізіп келеді.

Дүниежүзілік жылқы күні – жылқының адамзат тарихындағы рөлін тағы бір мәрте бағалап, ұлттық ат мәдениетін сақтау мен оны келешек ұрпаққа жеткізудің маңызын айқындайтын күн.

5 500 жылдық тарих. 169 мемлекеттің қолдауы. 11 шілде – жылқыға деген жаһандық құрметтің жаңа күні.

Дүниежүзілік жылқы күні құтты болсын!

Қазақстан Республикасы Ат спорты федерациясы