Қазақстандық шабандоздар Нидерландтағы  CSI2* халықаралық турнирінде екінші қола жүлдеге ие болды

Қазақстан ұлттық құрамасының мүшесі Олег Соколенко Нидерландта өтіп жатқан Ermelo CSI2* конкурдан халықаралық турнирінде қола жүлде иеленді.
Биіктігі 140 сантиметр болатын №7 Maessen Tent Supply Prize CSI2* маршрутына 85 спорттық жұп қатысты. Олег Соколенко мен Cinderella айып ұпайсыз өнер көрсетіп, 63,79 секунд нәтижесімен үшінші орынға ие болды.
Нәтиженің жоғары деңгейін жарысқа қатысушылардың құрамы да айғақтайды. Олег Соколенко бірқатар танымал халықаралық шабандоздан жоғары нәтиже көрсетті. Олардың қатарында Нидерланд өкілі Marc Houtzager – 9-орын, оның отандасы Frank Schuttert – 17-орын, Германия өкілі Laura Klaphake – 22-орын және америкалық шабандоз Lucas Porter – 26-орын алды.
Сондай-ақ Нидерландтың бірнеше дүркін Олимпиада жүлдегері Maikel van der Vleuten де қазақстандық жұптан кейін қалды. Ол жарысқа екі атпен қатысты. Нидерланд конкурының үздік өкілдерінің бірі Kim Emmen де қазақстандық жұптан төмен нәтиже көрсетті.
Осы маршрутта тағы бір жоғары нәтижені Раиса Соколенко Uran Nad Wigrami атты атымен көрсетті. Қазақстандық жұп та қашықтықты айып ұпайсыз аяқтап, 65,75 секунд нәтижесімен 85 қатысушының арасында сегізінші орын алды.
Осылайша, биіктігі 140 сантиметр болатын CSI2* маршрутының қорытындысы бойынша бірден екі қазақстандық спорттық жұп үздік сегіздікке енді. Екі жұп та жарысты айып ұпайсыз аяқтады.
Бұған дейін, 19 тамызда, Раиса Соколенко Uran Nad Wigrami атты атымен биіктігі 135 сантиметр болатын Eventanations Prize CSI2* маршруты бойынша үшінші орын алған еді.
135 және 140 сантиметрлік маршруттардағы екі қола жүлде, жүлделі орын әкелген екі таза нәтиже және 140 сантиметрлік маршрутта бірден екі қазақстандық жұптың ТОП-8 қатарына енуі – Қазақстан құрамасының Эрмелодағы халықаралық турнирдегі жоғары нәтижесі.
Турнирдегі өнер көрсету Олег және Раиса Соколенконың Еуропадағы жарыс бағдарламасы аясында өтіп жатыр. Қазақстандық спортшылар Нидерланд, Польша және Германиядағы халықаралық жарыстарға жүйелі түрде қатысып, жоғары бәсекелестік жағдайында тәжірибе жинақтап, бірнеше спорттық жұппен жұмыс істеп келеді.
Еуропалық жарыс бағдарламасы маусымның басты додасы – Жапонияда өтетін XX Азия ойындарына дайындықтың бір бөлігі. Онда Олег және Раиса Соколенко Қазақстан құрамасының сапында ел намысын қорғайды.
Жалпы, Эрмелодағы турнирге 17 елден 91 спортшы мен 179 ат қатысты.